Botaremos a andar
lendo a obra de Jules Verne, A volta ao
mundo en 80 días (na edición galega de Xerais). Detrás de Phileas Fogg,
deterémonos en distintos lugares e buscaremos información, servíndonos das
novas tecnoloxías, arredor das linguas dos pobos que habitan eses lugares.
Recolleremos a información de xeito individual, en Fichas, que gardaremos para engadir ao produto final da nosa viaxe.
Recalaremos moi
especialmente na Península Ibérica que habitamos, para averiguar que linguas e que
pobos ocupan este territorio do sur de Europa. Investigaremos en internet e
recolleremos, individualmente, os datos nunha Presentación Informática que, posteriormente, exporemos na aula.
Deterémonos, tod@s
xunt@s, nalgúns fragmentos da nosa lectura, para aprender novas palabras, para
memorizar visualmente a súa ortografía ou para averiguar entre tod@s de que
tipo de palabras se trata. Poñeremos en práctica o aprendido a través de Actividades sobre o Funcionamento da
Lingua.
Vogaremos con vento
a favor cando sexamos quen de producir
novos textos que imiten aqueles cos que facemos a nosa singradura. Para
isto teremos unha Guía que nos
servirá de modelo.
Arribaremos cando
acabemos a nosa volta ao mundo e traiamos con nós as 80 linguas que fomos
procurar, ademais de moitas ganas de usar a nosa. Nese momento estaremos en
condicións de elaborar un Mural no que, entre tod@s, pintaremos un mapamundi.
Debuxaremos a contorna dos continentes e a dos países polos que viaxamos.
Engadirémoslle os datos das nosas Fichas e da nosa Presentación Informática.
Ollando o
mapamundi, lembraremos coa memoria colectiva a nosa viaxe e avaliaremos canto
medramos. Entón, se nos sentimos máis sabi@s, se o produto nos agrada,
asinaremos a nosa obra e cantaremos, xunt@s, a Rianxeira.
Ningún comentario:
Publicar un comentario